15 лютага ў Рэспубліцы Беларусь адзначаецца памятная дата – Дзень памяці воінаў-інтэрнацыяналістаў. У краіне праходзяць урачыста-жалобныя і патрыятычныя мерапрыемствы, прысвечаныя гэтай даце.
У памятнай цырымоніі на Востраве Мужнасці і Смутку ў Мінску на чале з намеснікам Кіраўніка спраў Прэзідэнта Рэспублікі Беларусь Мікалаем Рагашчуком прынялі ўдзел воіны-інтэрнацыяналісты, якія працуюць у падпарадкаваных арганізацыях ведамства.
Цяпер у арганізацыях Кіраўніцтва справамі Прэзідэнта працуе больш за 113 воінаў-інтэрнацыяналістаў.
Традыцыйна 15 лютага ветэраны-афганцы збіраюцца разам, каб узгадаць сваю нялёгкую службу, саслужыўцаў-аднапалчан, успомніць баявых таварышаў, якія не вярнуліся з поля бою. Гэты дзень святы для тых, хто ваяваў у Афганістане і членаў сем’яў загінуўшых.
У працоўных калектывах арганізацый Упраўлення справамі Прэзідэнта Рэспублікі Беларусь гэтымі днямі праходзяць памятныя мерапрыемствы, удзельнікам афганскай вайны аказваецца матэрыяльная дапамога, уручаюцца падарункі, арганізоўваецца ўдзел у грамадскіх мітынгах.
Вывад вайскоўцаў Абмежаванага кантынгенту савецкіх войскаў (ОКСВ) з Афганістана завяршыўся 35 гадоў таму – 15 лютага 1989 года. Па ацэнцы некаторых сучасных палітолагаў, гэта была першая буйная антытэрарыстычная вайна ў найноўшай гісторыі.
15 лютага 1989 года апошні савецкі салдат перайшоў мост памежнай ракі Амудар’я пад Тэрмезам – завяршыўся вывад савецкіх войскаў з Афганістана. Вайна ў Аўганістане доўжылася 9 гадоў 1 месяц і 18 дзён.
Больш за 14 тысяч савецкіх воінаў загінулі на чужой зямлі, 6 тысяч памерлі пасля ад ран і хвароб, 311 чалавек прапалі без вестак. Гэта былі найбольшыя страты Савецкай Арміі з часоў Вялікай Айчыннай вайны.
Час аддаляе нас ад тых падзей. Не стала магутнай дзяржавы, чые інтарэсы абаранялі ў далёкім Афгане і тысячы беларусаў. Аднак, памяць аб вайне па-ранейшаму болем адклікаецца ў сэрцах маці, бацькоў, удоў, дзяцей тых хлопцаў, якія вярталіся дадому “грузам-200”.
У Аўганістане з 1979 па 1989 гады праходзілі службу каля 30 тысяч ураджэнцаў Беларусі. З іх 771 чалавек загінуў, 12 чалавек лічацца зніклымі, больш за паўтары тысячы атрымалі раненні і калецтвы, 718 сталі інвалідамі. Сёння ў адным толькі Мінску жывуць больш за чатыры тысячы ветэранаў вайны ў Афганістане, з іх – больш за 200 інвалідаў, а таксама 97 сем’яў – бацькі і ўдовы загінуўшых воінаў-інтэрнацыяналістаў. Для іх, як і для нас гэта – Дзень памяці.
