АЛЯКСАНДР ЛУКАШЭНКА ЎСТУПІЎ НА ПАСАДУ ПРЭЗІДЭНТА РЭСПУБЛІКІ БЕЛАРУСЬ

25 сакавіка ў Зале ўрачыстых цырымоній Палаца Незалежнасці адбылася ўрачыстая цырымонія інаўгурацыі. Цырымонія пачалася з праезду картэжа Прэзідэнта ў суправаджэнні ганаровага эскорту матацыклістаў па двух галоўных сталічных праспектах – Незалежнасці і Пераможцаў.

За некалькі хвілін да прыбыцця Аляксандра Лукашэнкі ў Палац Незалежнасці ўнеслі Дзяржаўны сцяг Рэспублікі Беларусь і штандар Прэзідэнта Рэспублікі Беларусь.

Далей пад гукі ўрачыстага маршу да месца правядзення інаўгурацыі ўнеслі Канстытуцыю Рэспублікі Беларусь. Адкрыў цырымонію старшыня Цэнтральнай выбарчай камісіі Ігар Карпенка, які абвясціў, што воляй народа Беларусі ва ўмовах свабодных і дэмакратычных выбараў Прэзідэнтам краіны абраны Аляксандр Лукашэнка.

Далей, паклаўшы правую руку на Канстытуцыю, якую спецыяльна вырабілі для цырымоніі на нашым прадпрыемстве, Аляксандр Лукашэнка вымавіў прысягу на беларускай мове: «Заступаючы на пасаду Прэзідэнта Рэспублікі Беларусь, урачыста клянуся верна служыць народу Рэспублікі Беларусь, паважаць і ахоўваць правы і свабоды чалавека і грамадзяніна, захоўваць і абараняць Канстытуцыю Рэспублікі Беларусь, свята і добрасумленна выконваць ускладзеныя на мяне высокія абавязкі».

Затым быў выкананы Дзяржаўны гімн Беларусі, пасля чаго Прэзідэнт падпісаў акт аб прынясенні прысягі. Старшыня ЦВК уручыў Аляксандру Лукашэнку пасведчанне Прэзідэнта Рэспублікі Беларусь, якое таксама было выраблена ў сценах нашага Дома друку.

Значная частка інаўгурацыі – прамова Кіраўніка дзяржавы пасля афіцыйнага ўступлення на пасаду. ПОЎНЫ ТЭКСТ

Скончылася цырымонія інаўгурацыі на плошчы Дзяржаўнага сцяга, дзе беларускія вайскоўцы прынеслі клятву на вернасць беларускаму народу і Прэзідэнту Рэспублікі Беларусь.

Усяго на мерапрыемства запрасілі больш за 1100 чалавек. У іх ліку вышэйшыя службовыя асобы, члены Прэзідыума Усебеларускага народнага сходу, дэпутаты Палаты прадстаўнікоў і члены Савета Рэспублікі, суддзі Канстытуцыйнага і Вярхоўнага судоў, кіраўнікі дзяржаўных органаў і арганізацый, мясцовых выканаўчых і распарадчых органаў, рэспубліканскіх сродкаў масавай інфармацыі, дзеячы навукі, культуры і спорту, прадстаўнікі дыпламатычнага корпуса і міжнародных арганізацый, акрэдытаваных у Беларусі.

Нагадаем, па выніках выбараў 26 студзеня 2025 года Прэзідэнтам Рэспублікі Беларусь быў абраны Аляксандр Лукашэнка. За яго кандыдатуру было пададзена 5 136 293 галасы выбаршчыкаў, што склала 86,82% ад колькасці грамадзян, якія прынялі ўдзел у галасаванні.

Цэнтральная выбарчая камісія афіцыйна зацвердзіла вынікі выбараў на пасяджэнні 3 лютага.