Аб прадпрыемстве

БЕЛАРУСКІ ДОМ ДРУКУ. САПРАЎДНАЯ ПАЛІГРАФІЯ

Выдавецтва «Беларускі Дом друку» – найстарэйшае паліграфічнае прадпрыемства нашай краіны: афіцыйнай датай яго нараджэння лічыцца 19 снежня 1917 года. Але архіўныя дакументы сведчаць: яго гісторыя сыходзіць сваімі каранямі ў далёкае мінулае – у 1797 год, калі была адкрыта Мінская губернская друкарня, якая стала пераемніцай друкарні Ордэна манахаў-базіліянцаў. Такім чынам, да слаўнай юбілейнай лічбы 100 смела можна дадаць яшчэ адну – 230.

Сімвалічна, што векавы юбілей «Выдавецтва «БДД» адзначаецца ў знамянальны год 500-годдзя нацыянальнага кнігадрукавання. Гістарычная эстафета выдавецкай справы і папулярызацыі друкаванага слова працягваецца.

Гісторыя БДД – гэта гісторыя нашай роднай Беларусі – гераічная, драматычная, накіраваная ў будучыню.

Прадпрыемства на розных этапах сваёй біяграфіі называлася па-рознаму: Мінская губернская друкарня, Друкарня Савета Народных Камісараў Заходняй вобласці і фронту, 1-я Савецкая друкарня, Друкарня імя І. В. Сталіна, Друкарня выдавецтва «Звязда», «Выдавецтва ЦК КПБ».

Але менавіта цяпер назва прадпрыемства найбольш поўна адлюстроўвае і яго высокі прафесійны статус, і яго вытворчую канцэпцыю. Беларускі Дом друку прыняў на сябе ганаровую місію прадстаўляць нацыянальную школу паліграфіі.

Тут былі надрукаваныя Асноўны Закон Рэспублікі Беларусь – Канстытуцыя і пашпарт яе грамадзяніна. На чарзе – біяметрычны пашпарт грамадзяніна Рэспублікі Беларусь, распрацоўкай і вырабам якога сёння займаюцца спецыялісты Беларускага Дома друку.

Мы вырабляем дзяржаўную, міжнародную, спартыўную, карпаратыўную сімволіку і атрыбутыку. Асаблівы гонар – вытворчасць сцягоў і гербаў, сімволікі незалежнай беларускай дзяржавы.

У выдавецтва «Беларускі Дом друку» высокі статус і ўзровень даверу з боку дзяржавы. Сёння над плошчай Дзяржаўнага сцяга ў Мінску лунае беларускі сцяг, выраблены на прадпрыемстве.

Наша прадпрыемства маладое, нягледзячы на ўзрост. Гарантыяй маладосці з'яўляецца дастойнае новае пакаленне паліграфістаў, якія сёння працуюць у цэхах БДД. Абнаўляюцца кадры, не стаіць на месцы вытворчасць, выкарыстоўваюцца найноўшыя тэхналагічныя распрацоўкі. Беларускі Дом друку – піянер у засваенні сучасных друкарскіх машын, творчы палігон айчыннай паліграфіі. У выдавецтве аператыўна перайшлі на электронны набор, колерадзяленне і выраб формаў метадам прамога экспанавання; тут засвоены друк шматпалосных поўнакаляровых газет, у тым ліку на мелаванай паперы, а таксама друк на іншых матэрыялах – тканіна, кардоне, розныя стужкі. Дом друку і даччынае прадпрыемства «Мінская друкарня» займаюць у Рэспубліцы Беларусь лідзіруючыя пазіцыі ў вытворчасці розных відаў упакоўкі.

Найбуйнейшыя газеты краіны – «СБ. Беларусь сегодня», «Звязда», «Рэспублiка», «Чырвоная змена», «Знамя юности», «Вечерний Минск», «Минский курьер», «Беларускі час», розныя галіновыя і абласныя выданні – шмат гадоў з'яўляюцца нашымі надзейнымі партнёрамі. Мы супрацоўнічаем з 83 рэдакцыямі. 30 мільёнаў асобнікаў газет штомесяц (больш за 57 найменняў), што складае амаль 80 адсоткаў ад агульнага накладу друкаваных СМІ ў краіне.

На працягу года Дом друку выпускае каля двух мільёнаў кніг.

З развіццём буйных гандлёвых сетак стала больш запатрабаванай рэкламная паліграфія – брашуры, улёткі, флаеры. У БДД друкуецца больш за 4 мільёны асобнікаў такіх выданняў у месяц. Забяспечваць аператыўнасць і высокую якасць прадукцыі на мелаваных паперах дазваляе новая тэхналогія Heatset.

Сёння Беларускі Дом друку – унікальная вытворчасць, дзе гарманічна спалучаюцца векавыя традыцыі і інавацыйныя тэхналогіі.

Паштовы адрас:
пр. Незалежнасці, 79/1, 220013, г. Мінск, Рэспубліка Беларусь  
Тэлефон +375 17 292 25 25
Факс +375 17 331 91 15
Адрас электроннай пошты:
bdp@domdruku.by
Генеральны дырэктар:
Алейнік Раман Сцяпанавіч
Прыём па асабістых пытаннях грамадзян — кожны аўторак з 15.00 да 17.00, каб. 417 (прыёмная).